ZAU DAN A LABAU KADUN.

 

Lashio Ginwang, Mung Jet Bang Shau Mare na Hpung Up Sara Balawng Du hte Jawng Saranum Lahpai Nang Htang yan a Shadang sha re. Zau Seng yan Zau Tu a Kanau majing re. Ma kaji daw Kanu a lata hta Jawng lung laika sharin la n'htawm, Kuthkai Lashio jawng matut lung nna Yanggung Dakkasu hpe B.A. madang du hkra sharin hkam la lu ai. Jawng lung let (UTC) Hpyen Training sharin hkaja la ai lam nga ai. Jawng rai n'pru ai sha Shanglawt Dap de matut mahkai nna Myo kata kaw bungli galaw nga yang, Myen Asuya ni rim nna Lashio Hkyuk Htawng hta sharen da ai hkrum u ai. Htawng kata rawng nga yang hpri chyen langai mu masawp mazing la nna dai hte Htawng shakum shadaw langai hpe n'htoi aten galu hte gadoi ret ga-nyet di hpaw la n'htawm, atsam dat ai hte Hkyuk Htawng kaw na bai lu gale lawt wa lu ai. 1962 ning kaw nna Shanglawt Dap de du sa wa ai. GSO magam lit hte bungli gun hpai mat wa ai.1964 ning hta Sam Amyu shayi Saranum Nang Htwi Hkam ngu ai (Manmaw Ginwang, Special Kong Hkam Circle kaw Orgr. galaw nga ai. ) Jan hpe Hkungran Dinghku de nna Shadang sha langai hte shayi sha langai shaprat ai.1966 ning kaw nna No.1 Bde. Comdr. 1973 ning kaw nna, 4th.Bde.Comdr. Magarn lit matut gun hpai mat wa ai. 1975 ning March shata praw 1 ya shani, Kudawng Ginwang, Mungmaw Pa Manhai mare Jawng wang kaw Myen Hkyeng (CPB) ni hte gap hkat ai gasat poi hta hkrat sum mat wa ai.

SHI GAW:

1. Myu Tsaw myit, Mung Tsaw myit kaba ai.
2. Prat nnan hpaji hpe chye chang ai.
3. Mung Masa Hpyen Masa lam hta kung kyang ai.
4. Hkam kaja n'gun atsam marai rawng ai Ningbaw Ningla langai mi re.